Xabier Txurruka

Enpresa berriak erakarriko ditugu Abendaño eta Errotaberriko industria guneetara, herriko ekonomia suspertuz eta lanpostu berriak sortuz.

Foru Aldundiaren eskutik, egun Zarautz zeharkatzen duen industria guneetara doan trafiko astuna autopistatik hegoaldera bideratuko dugu.

Kirol aukerak zabaltzeko, Asti kirol gunea garatuko, atletismo pista, kirol desberdinetara bideratutako belar artifizialeko zelaia, eta padel udal kantxa estaliak eraikiz.

Herriaren bihotzean, Santa Klaran, Zarautzek behar duen XXI. mendeko udal liburutegi moderno, berritzailea eta denei irekia sustatuko dugu.

Herriko Jubilatu eta Pentsiodun elkarteen egoitzetan hainbat hobekuntza burutuko ditugu eta, Aldundiarekin elkarlanean, Ebro Etxea eraikina hirugarren adineko pertsonen zerbitzuetara bideratzeko lanketa egingo dugu.

Salberdinen, Lanpardo kalean eta Iritan, zarauztarron etxebizitza beharrari erantzuteko, 321 etxebizitza babestu eraikiko dira, alokairu sozial eta eskuragarrian.

Iñurritzan autobus geltoki berria eraikitzeaz gain, lurpeko aparkaleku publikoak ahalbidetuko ditugu herriko zenbait gunetan. Bidegorri sarea indartu, eta Alde Zaharreko kaleen oinezkotzea burutuko dugu.

Aldapetako bi hiri igogailuak martxan direla, hiru igogailu berri jarriko ditugu Vista Alegreko auzotarren irisgarritasuna errazteko.

Astiko aisialdi gunean kantina berria irekiko da, eta haur parkeen berritze planak jarraipena izango du: Pilartxo Eneakoa izango da estaliko dugun hurrengoa.

Zarautzen euskara sendotzeko beharrezko baliabide guztiak bideratzeaz gain, Zarauztik mundura zabaltzeko Hizkuntza Eskola Ofizialaren egoitza finkatuko dugu.